A música tradicional e contemporánea únense en Ribadeo con Kornucopia e unha Foliada Aberta
O sábado 22 de marzo, o Cine Teatro de Ribadeo converterase nun punto de encontro para a música en directo cun evento que fusiona sonoridades actuais e tradición galega. A noite comezará ás 22:00 h co concerto de Kornucopia, unha banda ribadense que bebe da esencia folk para ofrecer unha proposta chea de forza e identidade.
Pero a festa non rematará aí. Tras o concerto, comezará unha Foliada Aberta, un espazo no que a música tradicional tomará o protagonismo da man de Amigos da Gaita e de todos aqueles que queiran sumarse co seu propio instrumento. Como é costume nestas celebracións, anímase ao público a traer a súa propia “cacharrada” da casa para compartir e manter viva a esencia comunitaria da nosa música.
As entradas poden adquirirse de maneira anticipada por 6 € en www.vendavalfest.com/galineiro, ou na taquilla por 8 €.
Unha noite para reivindicar a música galega, a súa evolución e, sobre todo, a súa capacidade para unir xeracións arredor dunha boa foliada.